PEMAHAMAN ADAT BATAK

PANGKATAION DI ULAON UNJUD PERKAWINAN**
(KALIMAT-KALIMAT MARHATA SINAMOT)

Setelah pengantin, keluarga, para undangan dan hula-hula kedua belah pihak pengantin sudah lenkap didalam ruangan, dimulailah acara.
1. Makan bersama
Untuk memulai makan, maka protokol memimpin acara, saling memberikan tudu-tudu ni sipanganon. Sampai selesai pembagian jambar.
♂ rodo hami pamoruan mu tu jolomu, pasahathon tudu-tudu ni sipanganon na tabo. Molo tung songoni pe naboi pasahaton nami, on dope rajanami nadapot gogo nami. Tangiangkon hamu hami parboruon muna on asa tusi hami mangalakka sai disima dapot pangomoan, asa boi sogot, umbalga pasahaton nami nalao palashon rohamuna.
Songoni pe naboi hupasahat hami tuhamu, las ma rohamu manjalo.Botima!
♀ Suang songoni ma nang hami. Dosdo nakkokna dos tuatna. Nunga hujalo hami tudu-tudu ni sipanganon
na tabo sian hamu, hami pe antong pasahaton nami ma tu hamu dekke simudur-udur. Asa mangundurhon nauli, mangundurhon na denggan ulaonta dibagasan sadarion. Botima!
(Doa makan dibawakan oleh paranak.) Setelah selesai makan, Pihak parboru menanyakan tudu-tudu ni sipanganon.
2. Pembagian Jambar
♀ Sai jolo niseat raut do ninna asa niseat hata. Nunga dipasahat hamu tudu-tudu nisipanganon tuhami, namanukkun mahami nuaeng tu hamu amang boru nami. Tarsongon dia ma baenonta on?
♂ Mauliatema rajanami. Ia naung hupasahat hami tu rajai, laos rajai ma na mangaturhon.Diama napatut sijaloon nami songon jambar taripar, las ma roha nami disi.
♀ Antong molo songoni amang boru dos ma rohanta. Tarsongon on ma ta baen: Satonga Parsanggulan, Satonga Somba-somba, satonga soit. Ima songon jambar taripar tu hamu amang boru!
(Didalam pembagian jambar, beberpa luat memberikan Osang secara utuh kepada tulang pengantin perempuan, di beberapa luat, osang dibagi dua, dan diberikan kepada boru dan bere hasuhuton. Demikian pula ihur-ihur. Di beberapa luat, ihur-ihur tinggal pada keluarga yang bolahan amak, sedangkan luat yang lain diserahkan kepada pihak pengantin perempuan sebagai ulak ni tandok).
♂ Mauliate ma rajanami, las ma roha nami disi.
(Tetapi sesuai dengan penjelasan di atas, pihak pengantin laki-laki dapat meluruskan tawaran pihak pengantin perempuan sesuai dengan luatnya)
Setelah pembagian jambar taripar sudah sah, masing-masing membagi jambar tersebut kepada
a. “Parsanggulan” tu hula-hula (di Toba), di Hubbang, “Osang” Tu tulang ni boru muli
b. “Somba-somba” diberikan kepada horong ni hula-hula
c. “soit” untuk dongan sabutuha, dohot tu dongan sahuta
d. “Parsanggulan” di Hubbang tu boru dohot bere. Di Toba, “Osang” do jambar ni boru dohot bere.
Sahat di son do ulaon ni protokol. Selanjutna dipasahat ma tu natua-tua asa nasida manontuhon nagabe raja parhata. Jala songonon ma hatana :
“ molo tinallik huling-huling, laos tarida holi-holi”.
“ Molo hahana marulaon, angginama nagabe panomboli “
Pinasahat ma tu hamu natua tua asa hamu namar dos ni roha, ise nagabe (raja panukkun) (raja pangalusi) di ulaonta on.
3. Marhata Sinamot
Dung simpul mangan, roma sukkun-sukkun sian par boru manang naung boi dimulai mangkatai. Pada umumna sai parboru do manukkun kesiapan ni paranak, naung boi manang naso boi dope mulaan.
Catatan : Biasana sebelum disukkun kesiapan ni paranak, nunga jolo marsipasangapann angka namarhaha anggi manang naise nagabe raja parhata.

a. Manukkun di lapatan ni sipanganon Masak
♀ Artia bona ni ari, sipaha sada bona ni bulan.
Asa takkas hita na mangkatai, pasahat hamuma Pinggan panukkunan.
♂ Alus ni Paranak
Nauli raja nami. Mangarade ma hamu, naroma hami pasahathon.(laos dipasahat ma pinggan panukkunan)
Dihatahon parboru ma pinggan panukkunan i
♀ Amanta raja dohot inanta soripada, takkas songon naung niidamuna, di jolo nami nunga sahat pinggan panukkunan, pinggan pasu, nahot dihundulan na. Hot ma pasupasu tajalo sian Tuhan ta.
Adong muse di bagasanna parbue pir,boras si pirni tondi.
Pir ma pokki, bahul-bahul pansalongan.
Pir ma tondinta tusi hita mangalangka disi ma dapotan pangomoan.
Boras si ribur-ribur, torop maribur ma pinompar ta huhut matangkang marjuara.
Di atasna adong napuran rata, napuran sirara uruk, hasoloman ni angka boru ni raja.
Napuran tano-tano ma rangging masi ranggongan, badan padao-dao anggo tondinta, tong-tong ma digonggom Tuhan.
Adong muse dibagasanna, ringgit sitio suara, ringgit na marmata, si palas roha ni amanta raja, na sinetak ni pamarentanta.
Las ma rohanta saluhutna, mamungka sadari on dinamangula ulaon ta hita,ditumpak asi dohot holong na sian Tuhanta.
(na jolo dohot do tango tango dibaen di atas ni pinggan panukkunan I, laos songonon ma hatana: adong muse diatas na tango-tanggo na marsaudara, mamukka sadari on lam tango ma partuturanta tu joloan ni arion)




b. Mandaulat sipanganon
Nunga bosur hita mangan, jala sagat marlompan juhut na tabo, Sir-sir dohot sirana, domu muse dohot asom na. Di bibir do dai na di tolonan do tabona. Jala sombu minum aek sitio-tio na tinahuan muna.
Sai pamurnas mai tu daging saudara tu bohi.
Si pasidak panaili, si paneang holi loja.
Bagot na marhalto ma na niagatan di robean.
Horas ma hami na manganhon, sai ditambai Tuhanta ma parsaulian dohot pasu-pasu na, dihamu na mangalehon.
Sai marakkup do nauli, mardongan do nadenggan.
Siakkup ni nauli,diama lakkat na dia ma unok na.
Dia ma hatana. Dia ma nidok ni sipanganon masak naung hujalo hami, takkas ma alusi hamu.
Paima so hu pasahat hami pinggan pangalusi, hubuat hami majolo tolu ringgit na marmata on, jala tinggal ma sada isi ni pinggan pangalusi. Asa sada hamu, si sada alus di namangalusi sukkun-sukkun nami. Hupasahat hami ma tu hamu.
♂ Alus ni paranak
Nungan hujalo hami Pinggan pangalusi, asa si sada alus hita saluhutna,disukkun-sukkun ni raja i.
Baris-baris ni gaja, di rura paraloan.
Molo manukkun raja, denggan mai oloan.
Molo ni oloan, dapot ma pangomoan.
Di naung manukkun rajai di sipanganon masak naung hupasahat hami. Raja nami !
Ritip jala hoppa, hotang pangarahutna.
Tung songoni pe na tupa, godang ma pinasuna.
Marbau tanduk, marbau holi-holi.
Godang sibutong-butong, otik sipirni tondi
Sai pamurnas ma tu daging, saudara tu bohi.
Sipasindak panaili, sipaneang holi-holi
Imatutu Rajanami songon nidok ni situa-tua,
Bagot na marhalto ma naniagatan di robean,
Horas ma rajai na manganhon,
sai ditambai Tuhan ma las ni roha dihami na mangalehon.
Anggo nidok ni sipanganon masak na hupasahat hami tu hamu, ndada sipanaganon dia I, Sipanganon panggabean parhorason do.
Botima !
c. Marhata sinamot
♀ Alus ni par boru
Mauliate ma amang boru! Sipanganon panggabean
parhorason do hape sipanganon masak na pinasahat mu tu hami.
Alai sai marakkup do nauli, sai mardongan do nadenggan.
Siakkup songon nahundul, sidongan songon na mardalan.
Ranting ni bulu duri, jait marjaihotan.
Siakkup ni nauli, dia ma sitaringotan?
Takkas ma paboa hamu.
♂ Alus ni paranak
Nauli raja nami
Asa takkas ma uju purba, takkas uju angkola
Asa takkas hita maduma, takkasan ma hita mamora
Si takkas ni nauli, takkas mai pinaboa.
Raja nami! Ia balga anak, pangolihononhon
Ia magodang boru, pahutaon.
Takkas songon naung binoto ni rajai, mamukka sian nasogot, dina taundurhon boru ni huriai tu bagas joro ni Tuhanta, ima boru ni rajai, dohot anak nami.
Laho manjalo pasusu pardongan saripeon sian Tuhanta marhite-hite naposona.
Jala naung gabe sada keluarga nasida di tonga-tonganta, ima anak nami nagabe helamu dohot boru mu na gabe parumaen nami.
Oppu raja di jolo, martukkot siala gundi
Adat pinukka ni oppunta napajolo ihuthonon ni hita parpudi.

Alani I songon naung masa taulahon, Raja nami, laos dison ma pasahaton nami tu hamu sinamot na gok, songon somba niadat nami tu hamu. Botima !
♀ Alus ni par boru
Mauliatema amang boru, na pasangaphon hami do hamu hape di sipanganon masak nahu jalo hami sian hamu, di somba ni uhum dohot somba ni adat, sial naung gabe parumaen mu ima boru nami jala anak mu na gabe hela nami. Songon pando ni situa-tua ma dohonon nami tuhamu;

Pitu lili nami, pa ualuhon jugia nami.
Nauli antong nipinami, gohan muma hajut nami.
Ndada talu mangido hami amang boru binsan naung ditaringoti hamu naeng pasahat somba ni adat ni boru nami hamu tu hami.

Barita ni lappedang, mardakka bulung bira. Barita ni hamoraon mu, sir-sir sahat tu dia

Aha pe nahu pangido hami, mamereng sinadongan mu,ndada pola sadia.

Piga bara ma lombu, horbo, dohot dorbia nasing,
Piga ma hoda asa pintor adong dalan ni angka amanta raja lao mulak,
Piga rante mas asa pintor dipangke angka inanta soripada.

sadia godang ringgit namarmata, perak, dohot angka na asing, songon somba ni uhum dohot somba ni adat mu tu hami.

Songon I ma pangidoan nami. Botima!
♂ Alus ni Paranak
Toho do angka nani dok ni rajai lobi sian idope nian pasahaton nami tu hamu. Jala napantas do pangidoan munai, pasahaton nami tu hamu. Didok situa-tua;
Songon na mandanggur tu julu do,
namangalehon tu hula-hula
Habang asisoit songgop tu toru bara,
unang dok hamu hami naholit, silehonon nami do soada.
Ndang tutukan batu, dakdahan simbora.
Ndang tuturan datu ajaran na marroha

Anak ni raja do hamu, Pinompar ni namarroha.
Ndada gulut di arta, ndang gulut disihumisik.
Partataring naso hea mintop, partamue naso ra suda
Na elek marboru, nasomba marhula-hula.

Raja nami, haburjuon munai do nahupangasanon hami, umbahen na barani hami manariashon sidohonon nami. Raja nami, tapasada ma sude pangidoan ni rajai dibagasan ringgit na marmata, natinongos ni pamarentanta, ima hodana, ima lombuna, ima dohot mas, perak dohot angka naasing, jala sisahali mangelek mahami tuhamu dibogasan sinamot na gok.
Botima !
♀ Alus ni par boru
Nauli ma amang boru!
Alai andorang so hu oloppon hami pangidoan munai, lean hamu satongkin tingki tu hami.
♂ Alus ni paranak; Na uli raja nami!
♀ Alus ni par boru
Dihita saluhutna, naung ta paihut-ihut pangkataion, di hita na mardongan tubu, boru dohot bere, tar lumobi ma di hamu horong ni hula-hula nami di namangido parboruon nami rajani ………………(marga ni paranak) asa si sahali manelekhon nasida disomba ni uhum dohot somba ni adat, asa ta alusi pangidoan nasida i. Hupasahat hami majolo

Tu Raja ni boru nami!
Sitolopi nauli nadenggan ma hami di dos ni roha ni rajai. Botima sian hami boru.

Pinasahat ma tu haha anggi!
Hajutmu do hajut hu,tandokmu do tandokhu
Alusmu do alushu, pandokmu do pandok hu.
Alusi damang ma si sada hata mahita!
Dihamu horong ni hula-hula nami,(digoari ma margana mulai sian hula-hula bona ni ari sahat tu hula-hula anak manjae)dijolo hamu siaduon, dipudi hamu sipaimaon, ditonga-tonga hamu nagabe raja paniroi.
Ditong-tonga nami ma hamu nuaenga rajanami asa tiroi hamu hami andorang so huolophon hami dope na sisahali mangelekhon nasida sinamot ni ibeberemuna.
Hupasahat ma tu hamu horong ni hula-hula nami!
Alus ni horong hula-hula

Nunga hubege hami hamu namasi alusan,
Tung mansai uli do dos ni roha muna,
Sidohonon nami tu hamu;
Balintang pagabe tumundalhon sidoan,
Ari mu do gabe molo olo hamu masi paolo-oloan
Botima!

Lata pe nalata, duhut-duhut do sibut-buton,
Hata pe dipahata angka amanta raja,
Alus ni hasuhuton pe tong do begeon.
Pinasahat ma tu suhut bolon!
Alus ni hasuhuton

Nunga hupasahat hami ulaon on tum hamu haha doli/anggi doli, laos hamu ma na mamutushon.
Botima!

Nungan dibege hamu amang boru! Alus sian mulai raja ni boru nam, pariban mu, sahat tu hula-hula nami, sian I botoon mu do naburju dohami marboru.

Asa takkas ma uju purba, takkas ma uju angkola.
Takkas ma buhul muna, takkas ma di bilanganna.
Sipasahaton muna, tu hula-hula muna.
Asa takkas hamu maduma, takkasan ma hamu mamora.
Anggo pangidoan munai huolophon hami mai! Botima.

♂ Alus ni paranak
Mauliate ma rajanami malambok pusu. Nunga pos roha nami manariashon sidohonon nami. Alai andorang so hudok hami bilang-bilanganna, asa lean hamu tikki satongkin tuhami.

♀ Alus ni par boru; Nauli amang boru!
♂ Dilanjuthom paranak
Dihita saluhutna, na mardongan tubu, boru dohot bere, tar lumobi ma di hamu horong ni hula-hula nami di nanaung dioloi hula-hulanta rajai………………(marga ni parboru) pangidoanta sisahali mangelekkon hita di somba ni uhum dohot somba ni adat, atik adong dope tamba ni naung tahatai di sibahenonnta tu raja i. Hupasahat hami majolo tu Raja ni boru nami!
Alus ni boru

Sitolopi nauli nadenggan ma hami di dos ni roha ni rajai. Botima sian hami boru.

Pinasahat ma tu haha anggi!
Alus ni hah anggi

Hajutmu do hajut hu,tandokmu do tandokhu
Alusmu do alushu, pandokmu do pandok hu.
Alusi damang ma si sada hata mahita!
Dihamu horong ni hula-hula nami,(digoari ma margana mulai sian hula-hula bona ni ari sahat tu hula-hula anak manjae)dijolo hamu siaduon, dipudi hamu sipaimaon, ditonga-tonga hamu nagabe raja paniroi.
Ditong-tonga nami ma hamu nuaenga rajanami asa tiroi hamu hami andorang so huhatahon hami dope bilang-bilang ni sinamot nanaeng pasahaton nami tu dongan saparhundul mu hupasahat ma tu hamu horong ni hula-hula nami!
Alusni hula-hula paranak
Nunga hubege hami hamu namasi alusan,
Tung mansai uli do dos ni roha muna,
Sidohonon nami tu hamu;
Balintang pagabe tumundalhon sidoan,
Ari mu do gabe molo olo hamu masi paolo-oloan
Botima!

Lata pe nalata, duhut-duhut do sibut-buton,
Hata pe dipahata angka amanta raja,
Alus ni hasuhuton pe tong do begeon.
Pinasahat ma tu suhut bolon!
Alus ni hasuhuton
Nunga hupasahat hami ulaon on tum hamu haha doli/anggi doli, laos hamu ma na mamutushon.
Botima!
Nungan dibege hamu raja nami! Alus sian mulai raja ni boru nami, sahat tu hula-hula nami dongan sahundulan mu.
Tung hansit do tangan mandanggurhon nasoada. Nunga sude namboru muna on paruarhon simpananna asa anggit tung umbalga pasahaton nami tu hamu, inama gokna.
Sitakkas ni bilangbilanganna siapasahaton nami tu hamu godang na Rp 150 jt (Sitombol, Rambu Pinudun sitombol, diluar ni panandaion dohot todoan) disima mas na, disi hodana, disi nang dorbianan, las ma rohamu manjalo. Boti ma!
♀ Alus ni par boru
Mauliate ma amang boru! Di bilang bilang ni sinamot nagok sipasahaton mu, songon somba ni uhum, somba ni adat mu tu hami.
Dihita saluhutna raja ni boru, raja ni dongan tubu, ale-ale, raja ni dongan sahuta, lumobi di hamu horong ni hula-hula nami, takkas songon naung tabege sinamot nagok sijalooan ta sian borunta, godang na Rp 150 jt. Dos ma rohan ta tahalashon mai.
Antong di hamu par boruon nami nunga rade hami lao manjalo pasahat hamu ma.
♂ Alus ni paranak
Mauliate ma raja nami, mangarade ma hamu roma hami pasahathon sinamot nagok
Udurma paranak mamboan sinamot (hepeng) di atas ni piring namarisi boras.
Parjolo ma dipasahat tu raja, baru pe asa tu hasuhuton. Ihut tusi laos mardalan ma panandaion tu suhi ni ampang na opat dohot tu angka na asing.
Naporlu di suhut par boru dohot paranak, ima di tingki pasahat upa tulang dohot tikting marakkup.
Pasahathon Upa Tulang.
Par boru manogihon paranak tu tulang ni namuli. Lao pasahathon upa tulang, songo on ma hatana.
Raja nami nunga hupasahat hami sinamot na gok tu rajai par boruon muna songon sinamot ni ibebere ni rajai godang otikna sian sinamot I hupasahat hami tu hamu lasma rohamu manjalo, jala tangiangkon hamu ma ibeberemu ima anak nami dohot parumaen nami. Asa gabe rumatangga na denggan, sitiruon jala nagok las niroha.Botima!
Pasahathon tikting marakkup
Par anak manogihon par boru tu tulang ni pangoli, lao pasahathon tikting marakkup. Songon on ma hatana.
Hot pe jabu I, hot margulang-gulang.
Tudia pe berei mangalap boru hot doi boru ni tulang.
Onpe di hamu dongan sahundulan nami maradophon pamoruonta marga . . . . . (margani paranak) nunga sisada boru hita maradophon nasida.otik godangna sinamot ni borunta naung hujalo hami saotik sian I hupasahat hami tu hamu. Asa molo ro nasida tubagasta gabe boru . . . .(margani tulangni pangoli)...ma borungki di jolo muna asa sida ajar hita dohot sisada poda tu kelurga na baru on, botima.
(Naeng ma nian hasuhuton langsung manghatahon on)

Catatan: Ditikki napasahat upa tulang, laos disima dipasahat hasuhuton piso-piso/situak natonggi tu horong ni hula-hula.
Ditikki pasahathon tikting pakkup, laos disima dipasahat hasuhuton piso-piso/situak natonggi tu horong ni hula-hulana.

Dung sidung dipasahat sude jambar hepeng dohot panandaion, dipasahat ma pangkataion tu paranak.
Mauliate ma raja nami! Di naung simpul hupasahat hami tu hamu sinamot nagok dohot angka panandaion pos situtu roha nami di pangidoan nami. Dos nakkon dohot tuat na, asa tangiangkon hamu ma hami rodi sude uduran nami marhite ulos herbang songo nima pangidoan nami raja nami!
♀ Alus ni par boru
Pos rohamu amang boru! Sude do hamu ulosan nami.
Aek natio do hami na riong-riong di pinggan pasu,
Hula-hula naburju do hami na gir-gir mamasu-masu.
Alai molo so sude pe hamu dapot ulos herbang,
Anggo ulos tinonun sadari pasahaton nami do tu hamu.
Mangarade ma hamu asa ro hami pasahathon.
(adong do naikkon di hatahon bilang-bilangan ni ulos, alai adong do saling porsea tu naung dihatai di na marhusip)
Najolo, marakkup-akkup do jambar hepeng dohot ulos ndang songon nuaen tung mansai rarat do nunga par jambaran naterjemhkan tu panandaion. Molo tung adong naharus dapot ulos alai ndang tarida di ulaon i, di jabu do dipasahat ulos i.

Dung sidung di pasahat ulos tohonan, mardalan ma ulos holong tu pengantin. Jala di namangulosi pengantin pe tong do nadapotan jambar tohonan di ulaon i.
1. Namar haha anggi sian suhut par boru dohot boruna.
2. Dongan sabutuha ni par boru dohot boruna
3. Dongan sahuta dohot ale-ale
4. Horong ni hula-hula ni par boru
5. Horong ni hula-hula ni paranak
Asa mangorui partikkian, nunga dipamasa halak ditikki namangulosi, laos disi ma didok angka hata sigabe-gabe, lumobi horong ni hula-hula.
Usul: diangka ulos holon, nung dumenggan di koordinir asa di hepenghon songon dalan mangurupi tu pengantin. Tunggodang pe ulos daponasida tongdo lao jualona di bawah harga. Molo di hepenghon ulos i dohot arga ni ulos na ummura, ra nunga manolong pengantin hita dikesulitan parhepengon.
Dung sae marhata sigabe-gabe, laos diuduti mamuse tikkir tangga dohot paulak une (istilah di pangarantoan ulaon sadari. Nunga dipatorang di jolo, taringot tu ulaon sadari)
Na porlu si pahaman di ujung ni ulaon, I ma ditingki mangolophon sude naung diulahon (mambagi olop-olop) asa unang ma dohot angka dakdanak na manjalo. Olop-olop I, ima sada tanda pertanggung-jawaban sian sude na manjalo. Molo tung adong persoalan sogot di ripe na imbarui, ikkon na manjalo I ma na gabe saksi dohot na paturehon persoalan ni ripe na imbaru I songon tanggung jawab dibagasan hukum perakawinan adat batak. **





Are you care to your culture • • • • • • • ?
Let’s to be come Bataknis
Don’t to be “HALAK HITA”